Songli Eiendom AS er eit aksjeselskap (stifta 4. mai 2017), eigd med like store delar, av Grytdalens venner, Orkla Jeger og Fiskerforening, Naturvernforbundet i Orklaregionen og Sør Trøndelag Jeger og Fiskerforening.  Formålet med Songli Eiendom AS er: “Kurs, skolering, tilrettelegging for friluftsliv og forskning, utleie av jakt, utleie av bygningsmasse for møter, konferanser, private selskaper og overnatting.”

7. desember 1907 etablerte Christian Thams selskapet Songli Jagtklub Aktieselskab som et privat jaktparadis, med mange prominente gjester opp gjennom åra.  I 1945 tok Direktoratet for fiendtlig eiendom beslag i Songli, da flesteparten av aksjonærene var tyske.   I 1951 kjøpte staten garden, med formål «Songli skal være en forsøksgård for viltforskning og viltpleie».  Songli var i drift som biologisk forskingsgård under Direktoratet for Naturforvaltning, og seinare leigd av Miljødirektoratet fram til 2012.

Grytdalens venner, Naturvernforbundet og Orkla Jeger og Fiskerforening tok tidleg opp arbeidet mot planane om sal av Songli, og det vart etter kvart eit tett samarbeid med Orkdal kommune og andre kommunar i regionen gjennom fleire år for å hindre salet.

I 2016 vart det underteikna ein avtale mellom Statsbygg og Orkdal kommune om 10 års leige av Songli.  Orkdal kommune har investert i nytt anlegg for vatn og avløp.  Songli Eiendom leiger Songli av Orkdal kommune, og driv anlegget i hovudsak med frivillig arbeid.  Det blir regelmessig arrangert dugnadar for vedlikehald av anlegget.